اسلام آباد (مانیٹرنگ ڈیسک )قومی کرکٹ ٹیم کے کھلاڑی اور سابق ٹی ٹونٹی کپتان محمد حفیظ کا کہنا ہے انہیں باقی ٹیموں کا نہیں پتہ لیکن پاکستان کی ٹیم فائنل ضرور کھیلے گی۔تفصیلات کے مطابق کے پروگرام میں گفتگو کرتے ہوئے محمد حفیظ کا کہنا تھا کہ وہ اپنی اہلیہ سے دو سال سے کہہ رہے ہیں کہ اُنہیں ورلڈ چیمپیئن بننا ہے اور ان کا سارا فوکس اس وقت ورلڈکپ پر ہے
۔ نجی ٹی وی اے آر وائی نیوز کے مطابق محمد حفیظ کا کہنا تھا کہ پوری ٹیم بہترین پرفارمنس دینے کی کوشش کرے گی۔ پاکستان کی فیلڈنگ میں بہت زیادہ بہتری کی ضرورت ہے۔ اس کے ساتھ اگر سپنرز پر بھی کام ہوا تو ہم ون ڈے ورلڈکپ میں بہترین ٹیم کے طور پر سامنے آئیں گے۔انہوں نے ریٹائرمنٹ کے حوالے سے گفتگو کرتے ہوئے کہا کہ انہوں نے 2023 کے کرکٹ ورلڈ کپ کی امید چھوڑ دی ہے، ریٹائرمنٹ کے بعد کوچنگ کے بارے میں نہیں سوچا۔ ورلڈکپ جیتنا میری زندگی کا خواب ہے اور خواہش ہے کہ ایسی کارکردگی دکھؤں جس سے پاکستانی ٹیم کو فتح حاصل ہو۔محمد حفیظ کا کہنا تھا کہ سپنرز کو پرفارمنس بہتر بنانا ہوگی، عماد وسیم اچھا سپینر ہے لیکن اُسے بھرپور محنت کرنے کی ضرورت ہے۔ انہوں نے رمیز راجہ کی بطور چیئرمین پاکستان کرکٹ بورڈ تعیناتی کو خوش آئند قرار دیتے ہوئے واضح کیا کہ ان کا سابق کرکٹر کے ساتھ کوئی اختلاف نہیں ہے۔واضح رہے کہ ٹی ٹونٹی ورلڈ کپ آئندہ ماہ 17 اکتوبر کو متحدہ عرب امارات میں شیڈیول ہے ۔ پاکستان اپنا پہلا میچ 24 اکتوبر کو روایتی حریف بھارت سے کھیلے گا۔
