وہ ملک جہاں غربت کے باعث مسلمان مرغیوں کی قربانی دینے پر مجبور ہوگئے

اسلام آباد(مانیٹرنگ ڈیسک) عید الاضحی پر مسلمان بکرے، دنبے، گائے اور اونٹ وغیرہ قربان کرتے ہیں لیکن یمن کے طویل جنگ سے متاثرہ مفلوک الحال شہری اس سال عید الاضحی پر مرغیوں کی قربانی دینے پر

مجبور ہو چکے ہیں۔ نجی ٹی وی چینل 24نیوز کے مطابق یمن کا شہر تعیز طویل عرصے سے حوثی باغیوں کے محاصرے میں ہے۔ شہر کے رہائشی فضل الصبی کا کہنا ہے کہ وہ عید الاضحی کے روز ذبح کرنے کے لیے دو مرغیاں خرید کر لایا ہے۔فضل الصبی 6بچوں کا باپ ہے اور ایک مزدور کے طور پر کام کرتا ہے۔ اس کی روزانہ کی آمدنی محض 2ڈالر (تقریباً 300روپے) ہے۔ فضل کا کہنا ہے کہ اس سال بڑے جانور کی قربانی ہماری استطاعت سے باہر ہو چکی ہے۔ یمن میں شہریوں کی اکثریت کا یہی عالم ہے۔ اقوام متحدہ کی طرف سے یمن کی صورتحال کو دنیا کا بدترین انسانی بحران قرار دیا جا چکا ہے، جہاں لوگ فاقوں مر رہے ہیں۔ تعز 2014ءسے شروع ہونے والی جنگ میں سب سے زیادہ متاثر ہونے والے علاقوں میں سے ایک ہے اور تبھی سے محاصرے میں ہے۔