اسلام آباد: پاکستان تحریک انصاف (پی ٹی آئی) کے ایم این اے فرخ حبیب کل جمعرات کو وزیر مملکت برائے اطلاعات و نشریات کا حلف لیں گے۔
اس کا اعلان وفاقی وزیر برائے سائنس و ٹیکنالوجی فواد چوہدری نے اپنے سرکاری ٹویٹر ہینڈل سے کیا۔ فرخ حبیب کو مبارکباد پیش کرتے ہوئے فواد نے تصدیق کی کہ وہ کل اپنے عہدے کا حلف لیں گے۔
اس سے قبل ہی یہ بات سامنے آئی تھی کہ فرخ حبیب کو اطلاعات و نشریات کی وزارت میں ایک اہم مقام ملنے کا امکان ہے جس کے لئے وزیر اعظم عمران خان نے بھی منظوری دے دی ہے۔
حالیہ کابینہ میں ردوبدل میں فواد چوہدری کو وزارت اطلاعات و نشریات کا چارج سونپا گیا تھا۔لیکن اب فرخ حبیب کو اس عہدے کے لیے نامزد کیا گیا ہے۔
شبلی فراز ، جو پہلے وزیر اطلاعات کی حیثیت سے خدمات انجام دے رہے تھے انہوں نے خیبر پختونخوا سے دوبارہ سینیٹر بننے کے بعد حلف نہیں اٹھایا۔ وفاقی کابینہ میں آئے روز تبدیلیوں کے باعث وزراء اپنے عہدوں پر دلجمعی سے کام کرنے سے قاصر ہیں۔
